Written by torisme
Coma cada an e ja ne son 13, o coma preferís díder eth president dera AECC, Catalonha Contra eth Càncer de Lhèida, “12+1”, s’an presentat un viatge mès es colonies gratuïtes entà mainatges damb càncer, organizades pera Associacion Espanhòla Contra eth Càncer, damb eth supòrt deth Conselh Generau d’Aran.
Coma rebremberen ena presentacion, eth sindic d’Aran, Carlos Barrera, e eth madeish president dera AECC en Lhèia Sr. Manuel López Morell, aguesta collaboracion de tanti ans a permetut e ac an de contunhant hènt, que fòrça mainatges e mainades de tot er estat d’entre 6 e 15 ans, qu’an patit malautia oncologica, poguen gaudir des colonies en un parçan privilegiat coma ei era Val d’Aran, que des deth prumèr moment acuelhec damb fòrça bona predisposicion aguest projècte, qu’ aguest an acuelherà a 100 mainatges e mainades procedents de tota Espanha.
Era AECC de Lhèida, participe enguan enes Prèmis Inocente 2012, convocadi pera Fondacion Inocente Inocente, enes qu’ un personatge famós pera sua trajectòria professionau, pairine un projècte sociau en ahèr d’enfància. Es diferentes candidatures de tota Espanha,dempús son votades e escuellhudes per votacion populara a trauèrs deth Facebook (des deth dia 10 e enquiath 27 d’abriu). Era candidatura e eth pairin mès votat s’emportarà 10.000€ entath sòn projècte.
Era AECC de Lhèida, presènte era candidatura ena qu’er aupinista Juanjo Garra, qu’actue coma pairin, a estat escuelhut entà diuèrsi motius, especiaument pera sua predisposicion cap ara entitat e eth projècte, era sinergia entre era montanha e er esperit de superacion, ar igual qu’era superacion d’ua malautia coma eth cancer. Atau donques, ei fòrça importanta era participacion e era votacion populara en defensa deth projècte e dera candidatura, e votar en aguest link, http://apps.facebook.com/inocenteinocente/ a trauèrs dera pagina de facebook dera AECC de Lhèida. Sonque s’admet un vòt diari per persona, çò qu’ei fòrça important que toti animen ath maximum nombre de persones entà participar-i, compartint eth link. I a de temps enquiath diuendres 27 d’abriu entàs 12 dera net.
