Written by torisme
Era conselhèra de Torisme, Anna Díaz Morelló, presènte era “Marca de Garantia de Productes dera Val d’Aran”, ena Hèira Internacionau dera alimentacion, e soslinhe qu’ “Era presentacion dera Marca de Garantia, culmine era prumèra etapa deth trebalh de consolidacion des productes de qualitat dera Val d’Aran”.
Pendent tota aguesta setmana, era Val d’Aran a estat present ena hèira d’alimentacion mès important deth món, Alimentaria 2012. Eth Conselh Generau d’Aran, a trauèrs de Torisme Val d’Aran, auie installat un stand laguens deth Pabalhon des Comunitats Autonòmes en espaci Prodeca, a on es restauradors e es empresaris deth sector dera alimentacion, productes artesanals e gastronòmics der Aran, an agut era oportunitat de presentar es sòns productes.
Era conselhèra de Torisme deth Govèrn d’Aran, Anna Díaz, auec era oportunitat de parlar damb es Princeps d’Asturies, Felip e Letizia, que mostrèren fòrça interés per coma auie anat era sason d’esquí ena Val d’Aran,e anauen acompanhadi peth Plan Aunorable President dera Generalitat de Catalunya, Artur Mas.
Tanben visitèc er stand de Torisme Val d’Aran, er Aunorable Conselhèr d’Agricultura , Ramaderia ,Pesca, Alimentacion e Medi Natural dera Generalitat de Catalunya, Josep Mª Pelegrí, qu’auec era oportunitat amassa damb era conselhèra Anna Díaz, de gaudir des plats presentats pes restauradors aranesi.
Era preséncia de Torisme Val d’Aran ena edicion d’enguan d’Alimentaria, a servit entà presentar era Marca de Garantia de Productes dera Val d’Aran, qu’ei ua apòsta deth Conselh Generau d’Aran, entara metuda en valor des recursi agroalimentaris d’Aran e protegir era sua identitat. Aguesta figura, garantís ath consumidor ua qualitat diferenciada deth producte e era sua produccion artesanau en origen.
Actuaument, era Marca de Garantia de Productes dera Val d’Aran, compde damb 11 productes e 10 productors, entre es quaus se trapen, eth paté, es anditos, era òlha aranesa, eth bolh, era langoïssa seca, er hormatge, eth iogurt, es tronquets, e aliments artesanaus de maxima qualitat coma era mèu e eth caviar. Ena edicion d’enguan d’Alimentaria s’a presentat tanben era bièra aranesa, Immortèla, elaborada de forma artesanau e de grana acceptacion entre es consumidors.
Çò que hè ara restauracion, sigueren quate es restaurants d’Aran que presentèren es sòns plats, laguens d’un Show Cooking, que permetie, a mès de tastar es plats, hèr preguntes as codiners mentre montaueneth plat de cara ath public.
Plat: Raviolis de carbassa farcidi de butifarra nèra e poma damb sausa d’hormatge de Bagergue.
RESTAURANT FONDA D’EN PEP
Plat: Magret de lit damb ceps e ceba confitada e gelée d’iranja.
Es restauradors e emprenedors aranesi valorèren fòrça positiuament era experiéncia que les a brindat Torisme Val d’Aran de poder presentar es sues creacions dehòra des sòns establiments. Alimentaria 2012, barrèc es sues pòrtes eth passat agèr dijaus, e ethConselh Generau d’Aran hè ua avaloracion fòrça positiua dera sua participacion en aguesta hèira qu’a servit entà dar a conéisher es Productes dera Marca de Garantia de Productes dera Val d’Aran.
