Written by torisme
Et diuendres 27 de junhèga, tàs sèt dera tarde, en Conselh Generau d’Aran i aurà lòc era presentacion deth huelheton “Micromamifèrs dera Val d’Aran” a cargue deth son dessenhaire e illustrador Alfons Raspall.
Aguesta publicacion mos apròpe ath mon des micromamifèrs, ei a díder es animaus rosigaires (arrats, boherons, arrats dromilhèrs) e ínsectivos (arrats-bohons, bohères) de mesura petita. Animaus qu’aué en dia non an fòrça bona premsa, mès son fonamentaus ena nòsta natura, dejà que constituïssen era basa trofica d’un gran ventalh de carnivòrs rapinaires.
Era Val d’Aran, damb era sua riquesa païsatgistica, a ua grana representacion d’aquestes espècies, des 30 espècies d’insectívors e rosigaires presentes en territòri catalan, ne trobam 25 ena Val. Espècies coma era bohèra muscadèla, er arrat-bohon mirgallat, eth boheron pirinenc, er arrat bohèr o er arrat dromilhèr gris, o ben an ací es sues uniques localitats de Catalonha o ben an es sues poblacions mès establides. Aguesta grana diuersitat d’espècies de micromamifèrs demore reflectida ena publicacion damb era sua illustracion e es detalhs des sues caracteristiques e abitats a on les podem trapar.
Maugrat era riquesa de micormamifèrs presents ena Val, eth son poblament ena val presente encarà aué fòrça incognites. Per aguest motiu des de hè uns ans, laguens d’un projecte mès ample de seguiment de micromamifers comuns s’an començat a establir ues estacions de seguiment damb eth supòrt deth Conselh Generau d’Aran. Aguestes estacions de seguiment permetràn, damb eth temps, resòlver dobtes e compréner mès ben es dinamiques poblacionas des espècies.
Frut d’aguèst projècte e der èxit des diferents corsi d’educacion ambientau sus micromamifers aufrits peth Conselh Generau d’Aran ei tanben aguest huelheton que non preten arren mès qu’animar-vos a empréner era vòsta descubèrta, en tot aufrir-vos pistes e recorsi entà que pogatz detectar e arreconéisher aguestes bestiòles de camp.
Alfons Raspall – Biologista, illustrador e divulgador ambientau
Professionau dera educacion ambientau damb ua longa trajectòria. Coma illustrador e dessenhaire a participat en nombroses publicacions, era guida de natura deth Parc de Collserola, eth manuau interactiu de mamifèrs e audèths dera fauna sauvatja deth Parc Nacionau (que tanben se hec en aranés damb era collaboracion deth Conselh Generau d’Aran) e fòrça autes publicacions e guides de descubèrta dera natura que destaquen sustot pes sues explicacions e grafics tant entenedors.
Tanben se destaque era sua professionalitat coma divulgador e educador ambientau que demore reflectida enes nombrosi corsi qu’a impartit, coma eth cors de micromamifèrs que se hec es passades setmanes en Parc Nacionau d’Aigüestòrtes e Estanh de San Maurici, atau coma es corsi que se desvolòpen des deth 2009 ena Val d’Aran sus coneishença des micromamifèrs. Atau madeish ei tanben responsable deth projècte SEMICE (Seguimient de Micromamifèrs Comuns d’Espanha) laguens der encastre de Catalonha.
